Posted on February 21, 2011, Monday
BINTULU: Rayat ba sitak Jepak dilalau ngena awak ke bisi ba sida nentuka pengari ti endang bebendar deka gawa sereta ngemansangka rayat lebuh pengawa bepilih diatur enda lama agi.
Menteri Muda Dagang Temuai, Datuk Talib Zulpilip madahka, rayat patut nemu milih pengari ke bagas sereta bebendar mantu sida ngambika pemujur pengidup ulih dijapai jemah ila.
“Pilih meh pengari ke bebendar ngemansangkan rayat,” ku iya ke lalu nyadi Kaban Kunsil Nengeri (ADUN) Jepak.
Ku iya, menua Bintulu ke benung ba proses pemansang laban deka nyadi siti bandaraya, benung richah ngatur mayuh projek ke besai, nya alai pemansang ke deka dipejalaika perintah patut dikemeranka ngambika sama diasaika ba genap iku rayat.
“Projek pemansang ulih meri awak endur bedagang enggau nyendiaka pengawa puang,” ku Talib bejaku lebuh bejadika
‘Program Karnival Keusahawanan, Merakyatkan Seni dan Budaya Jepak’ di Medan Niaga SEDC Jepak kena malam kemari.
Talib nandu baru, senindik enggau pemansang menua, rayat ke bisi nelebaka diri ba pengawa dagang sereta ke bukai bulih sigi mayuh penguntung ari nya.
“Ba kitai ke bejalaika pengawa dagang patut ngembuan ulah ti manah sereta ulih berunding enggau positif ti ulih nentuka pemujur kitai,” ku iya nerangka.
Iya ke lalu nyadi Chairman Gerempung Pemansang Ekonomi Sarawak (SEDC) mega ngansak rayat ulih bekempit sesama diri ngambika penyerakup bansa ulih dijapai. Nengah penyerakup, semua pengawa pemansang mujur diatur ngambika enda puntan ba tengah jalai.
No comments:
Post a Comment