MoCS: PBB Bintulu enggau PAV ngaga ripot polis

MANTAH: Pandi (empat kiba) begambar bebala mayuh mantaika ripot polis ti udah digaga.

Utusan Borneo
Posted on May 18, 2011, Wednesday

BINTULU: Parti Pesaka Bumiputera Bersatu (PBB) pampang Bintulu begulai enggau Gerempung Anak Vaie (PAV) ngaga ripot polis ba Balai Polis Bintulu ditu bekaul enggau penerang ti dipansutka Chairman Movement Of Change Sarawak (MoCS), Francis Paul Siah.

Pengawa ngaga ripot tu betuaika Sapit Tuai PBB menua Sarawak ti mega Tuai PBB pampang Bintulu, Pandi Suhaili sereta disempulangka raban dua bengkah gerempung nya.

Nitihka ripot polis, penerang ti dipansutka Francis ba sebengkah media elektronik ke minta Kepala Menteri (CM) Sarawak ngemaduka diri nyadi KM sebedau 13 Ogos tu.

“Kena 16 Mei urung pukul 7 lemai aku bisi tebachaka penerang ti dipansutka Chairman MOCS ti minta CM ngemaduka diri nyadi CM sebedau 13 ogos.

“Enti CM enda ngemaduka diri, sida deka ngaga demontrasi rayat ngambi ngelabuhka KM.

Nambahka nya mega, Suhaili madahka pengawa nya baka ‘subverstif’ ti tau ngasuh ati orang nyida tauka ringat.

“Kelebih agi pengawa nya sigi salah ba Undang-undang menua Malaysia,” pia ku penerang ti dipansutka Pandi ba ripot polis kemari.

Berebak enggau nya, Suhaili ti ngarika PBB pampang Bintulu nyengkaum PBB pampang Jepak, Belaga, Kidurong, Kemena enggau Kakus ngarapka raban polis ulih bejalaika pengawa mansik kes tu enggau jampat agi.