Posted on September 4, 2012, Tuesday
BINTULU: Raban Nembiak Parti Pesaka Bumiputera Bersatu (PBB) Sarawak minta pemacha berita TV3 Nurul Syuhada minta ampun nengah stesyen tv nya empu ngagai semua rayat Sarawak beduduk ari jaku iya ti madahkan “Bintulu merinsa” maya iya nyadi pengacara ba pengerami Hari Merdeka ti disambut ba Dataran Merdeka kena Hari Lima tu tadi.
Ku Sapit Ketuai PBB Sarawak Pandi Suhaili, Raban Nembiak PBB Sarawak nadai deka ngemanjai ke isu tu laban Nurul Syuhada udah minta ampun ba akaun twitter iya empu.
“Tang meh kami (Raban Nembiak PBB) minta Nurul Syuhada empu minta ampun nengah TV3 dikena ngeyelap ke rayat ba menua tu kelebih agi peranak Bintulu empu,” ku iya.
Peranak ba menua Bintulu berasai ringat sereta enda lantang ati beduduk ari pengacara tv nya ti madahka menua ti digelar “Kota Tenaga Sarawak” tu “mensena” ti mai reti seranta sereta jauh tinggal ari pemansang.
Ku iya, semua rayat ba menua tu nemu Bintulu endang siti menua ti balat mansang kenyau ari suba laban industri gas enggau minyak sereta industri besai ti bukai kelebih agi pemansang SCORE ti benung dipejalaika diatu.
“Nadai kebuah Bintulu tau dikumbai seranta tauka menua ti jauh ke menua ulu laban ditu meh penumbuh industri besai ti nyungkak penatai pemisi menua Sarawak jemah ila lalu ke pemadu dikemerat menua Bintulu sigi pengeluar lumur satu ngagai Keluaran Dalam Negara Kasar (KDNK) ba menua Malaysia tu,” ku jaku iya.
Ku iya, menua Bintulu endang iya antara menua ba Sarawak ti benung mansang baka ke diatu sungkak ari pemansang SCORE ti narit mayuh urang dagang ari dalam enggau luar menua tu datai ke Bintulu lalu jaku “Bintulu daif” endang siti jaku ti salah sereta enda patut dipansut.
“Nya alai aku ti bejaku ngarika Raban Nembiak PBB Sarawak ngarapka TV3 enda agi ngulang penyalah ti sama sereta lebih bejimat maya ti ngeluarka jaku senentang pemansang ba menua siti-siti,” ku iya.
Pia mega ku Pandi, iya ngarapka Nurul Syuhada semampai ngemansangka diri empu dalam dunya pemberita enggau pengacara enggau jalai ukai semina ngaga riput ari utai ti semina didinga enggau dipeda aja, tang mansik enggau silik sebedau nyerita.
No comments:
Post a Comment