Bintulu udah jauh mansang kenyau 40 taun ke udah: Talip

Utusan Borneo

by Ambrose Rirang. 

Posted on September 19, 2012, Wednesday

ADAT: Talib (dua ari kanan) enggau bini iya Datin Hajah Dr Zaleha Abdullah
benung nyepi pemakai ti bisi dinahka ba pengerami ‘berlanggar’ ti diatur
JASA Bintulu, bedau lama tu tadi.

BINTULU: Menua Bintulu udah balat mansang kenyau ari 40 taun ke udah beduduk ari polisi perintah ti ngemeranka politik pemansang sereta kiruhka nasit rayat ti nguan menua tu, ku Menteri Muda Dagang temuai Datuk Talip Zulpilip.

Ku Talip, sebedau tu Bintulu sigi siti genturung pendiau ti bejalaika pengawa berikan sereta dikembuan urung 5,000 iku mensia tang diatu penyampau nya udah manggai ngagai lebih 200,000.

Tu nandaka Bintulu udah jauh mansang beduduk ari pemansang pengawa industri ti benung ngerembai baka ke diatu.

“Nya alai, lebuh maya Hari Malaysia diintu ba Bintulu aku berasai gaga sereta temegah ati laban nya nunjukka perintah besai enggau menua endang ngenang Bintulu sebengkah ari palan ekonomi ti beguna ba Malaysia,” ku iya bejaku.

Talip mansutka jaku tu lebuh ti bejadika pengawa “Berlanggar Jasa” ti diatur Opis Pekara Khas (JASA) Sarawak ti diatur ba Bangunan Martabat ditu kena lemai Hari Satu tu tadi.

Ku iya, Bintulu ti benung mansang dalam mayuh bengkah pengawa industri lebih agi ba projek SCORE udah berengkah dipejalaika lalu projek tu ila ukai semina deka ngemansangka kandang menua Bintulu, tang mega ngagai rayat menua Sarawak.

“Aku andal bendar pemansang SCORE tu ila ulih mai pengelantang ngagai rayat di Bintulu beduduk mayuh peluang pengawa ungkup rebak baru kelebih agi ti ngambi bidang kejuruteraan enggau pengawa dagang,” ku Talib.

Ku iya, gawa dalam industri ba SCORE, ulih mantu nambahka penatai pemisi ruang bilik lalu ngujungka sida tu bulih penatai pemisi ti tetap sereta meruan laban pengawa ba projek besai tu sigi nadai nemu abis.

Kena ngerebut peluang kereja ba SCORE ku iya, raban nembiak ke deka nampung pelajar sida ngaga palan pelajar tinggi ngambi bidang ti bekait enggau kejuruteraan baka mekanikal enggau elektrikal laban dua bengkah pengawa tu balat dipegunaka ba SCORE jemah ila.

“Nya kebuah aku selalu ngelalau semua peranak Bintulu semampai nyikap diri enggau penemu kejuruteraan sereta penemu bukai ti bekait enggau pengawa industri ngambika senang bulih pengawa jemah ila,” ku Talip nambah.

Sapit Ketuai PBB Sarawak Pandi Suhaili, Pengarah JASA Sarawak Hassan Busu, Temenggung Abang Suhaili Abang Mohamad enggau Pengulu Drahman Kawi entara ke bisi datai ngulu pengerami nya.