Nembiak PBB Zon Utara ngaga riput polis ke atas seiku panel TV1 ‘Bicara Kampus’

Utusan Borneo
Posted on September 18, 2012, Tuesday

PEMAIK DIJAGA: Raban nembiak PBB zon utara begelumu ba Balai Polis Sibu udah ngaga
riput polis ba Mohd Yusri.

KUCHING: Bisi 200 iku ra­ban nembiak ari 23 pampang Nembiak PBB ba menua tengah begelumu ba balai polis Sibu empai lama ke udah sereta ngaga riput polis ke atas seiku raban panel TV1 ‘Bic­ara Kampus’ ti mega pelajar UKM, Mohd Yusri Idrus, ke ngaga komen ngemaruhka Sarawak.

Nitihku mandal Chairman nembiak PBB Pandi Suhaili, riput polis nya digaga ngam­bika pemaik ke diasai ba Malaysia enda dikena ngatur pengawa ke enda menuku nyengkaum pekara bula ti balat nyima peranak Sarawak ke dibantai Mohd Yusri maya program ba TV nya.

“Rebak baru aruh meretika sejarah penumbuh Malaysia lalu enda meda pekara nya nyadika pekara sempiar aja. Tu ngenukuka pemaik ke diasai kengkah penumbuh Malaysia aruh ditan sereta diseridi,” ku iya.

Pandi nerangka tuju gaga riput polis nya ukai deka nge­manjai isu tang deka negapka penyerakup ke endang udah bisi.

“Kitai arap opis menteri ke bekaul nngetuka program ‘Bicara Kampus’ dikena masa sereta ngemeratka pemaik di Malaysia,” ku Pandi.

Berebak enggau nya mega, pampang nembiak PBB di zon utara udah ngelanjar atur pengawa ke sebaka di Miri tang mayuh raban sida agi kisuk enggau pengerami Hari Malaysia ke diatur di Bintulu.

Enda semena -mena genteran Mohd Yusri nyadi baru beminggu pengudah isu ke sebaka bepijar ari person­aliti TV Nurul Syuhada Nu­rul Ain ke ngumbai ‘Bintulu Daif’ reti nya seranta udah nyelup api pengeringat ba bandar minyak enggau gis ke taun tu nyadi tuan ru­mah ngatur pengerami Hari Malaysia.